Sit das al min
hoͤchste froͤide an dir stat·
liebe trute mine·
so heis noch mir din
rotes múndel geben rât·
das mit sinem schine
machen kan vil klůgú herzen sinnelos·
ach here got· wie rechte los·
sach ich von ir ein lachen·
Swer also clar·
ir kússen gar· dur súberlich
guͤtlich moͤcht er werben·
wol tusent iar·
muͤst er froͤilich froͤien sich·
vnde solt er sterben·
iemer mere fuͤre sin sele deste bast·
eia truter munt nu gib mir das·
son getrur ich niemer·
Uil gros gedank·
lat mich nu vil selten vri·
liep vor allen vrǒwen·
din kel so blank·
vnd din lip so lieb mag si·
wan mag 227v an dir schǒwen·
hende weich noch wisser zên stunt danne ein snê·
alles das dú hast was sol des me
ist súberlich an ende·