Si reine si schoͤne si herze liebe gůte·
si selig wib
alleine· wont gewalteklichen in minem můte·
ir lieber lib·
můs mir doch iemer
der liepste sin·
so rot wart nie noh enwirdet niemer·
als ir vil trutes múndelin·
IR lachen ir glêsse· ir liechten ǒgen blicken·
ir werder grůs·
kan machen· das vor froͤiden in dem lib erschriken·
min sele můs·
das hab ende·
selkes wart nie nicht·
durch got secht· ir kel ir weichen hênde·
die sint wisser danne ichtes icht
Ich wolde ir gevangen sin gerne· vnuerdrossen·
so das si mich
dort solde· in blanken armen haben geslossen·
niemer koͤnd ich
min leit gerechen·
an der truten bas·
ir múndel kust ich vnd wolde sprechen·
sich diner roͤte habe dú das·