Sich froͤid manig vogellin wilde·
gen des liechten meijen guͤte
durch die sumerzit·
zieren kan sich das gevilde·
schǒwent an der bǒmen blvͤte
wie dv́ heide lit·
so gar wunneklich bekleidet·
vnde mir das alles leidet
der vil lieben strit·
So hat si mich mir hůte
das ich weder vil noch kleine
miner selbes eigen bin·
wie der lieben wirt ze můte·
dar nach můs ich leben eine
svnder minen sin·
wil si das ich froͤide tribe·
das stat an ir eines libe·
si hat mich da hin·
Wer ich min als ir bisunder
ich enwolt ir wibes gvͤte
strites nicht erlan·
nv lig ich gewaltes vnder·
si hat min vnd ir gemvͤte·
das ich niht enhan·
lichte wirt ir noch ze sinne·
das si mich tvͤt froͤiden inne·
ich han lieben wan·