Svmer wunne
nig dem svͤssen meiien
dvr sin kleiden
wan er birt vns mange blv̊t·
rote rosen
vol var die gleiien·
vnd vf heiden
manger leije· wunne frůt
da bi sen ich nach der losen·
dv́ mir liebet sam dv́ svnne·
dem si wunneklichen tv̊t·
Dv́ vil gůte
secht dv́ heisset fine·
wol den ǒgen
da si sich zesehenne bot·
svͤsse loͤne
in ir herzen schrine·
treit si tǒgen
die sint gůt fv́r sênde not·
ich was der si sach so schone
da von wart mir wol zemůte·
ich sach si vúr rosen rot·
Svͤsse minne
ia dvrch dine gvͤte·
wart an wiben
wibes name nie so gůt·
ia si herze
kan fv́r meijen blvͤte
leit vertriben·
dem sis minneklichen tůt·
vs rotem munde sinne
froͤwet mich ein kv́ssen mere·
bas dan aldes meijen blv̊t·