Secht des meijen blvͤte·
froͤit die vogel in dien ǒwen·
so froͤit mich ein minnekliches wip·
dv́ git mir gemuͤte·
vnd lat mich an ir schǒwen·
wunde die mir sprechent vro belib·
wes sol ich mich frǒwen me·
si went mit ir gvͤte·
das si zimet wol ze frǒwen·
vnd heisset senden leitvertrib
Ich wil iemer mêre
han die lieben zeinen meijen·
sid ir varwe kan so stete sin·
swer mir das verkere·
der var in den meijen reijen·
vnd las mich an der vrǒwen min·
vil ist des ich minn an ir·
so des meijen ere
varwe reret stolzen leiien·
secht so gent ir wengel liechten schin·
So der vogel kosen
von den kalten rîffen· swachet
vnd dv́ heide bar der blv̊men lit·
dannoch sich ich rosen
wann ir rotes múndel lachet
in der minne blvͤien wider strit·
wer hat alsus froͤide gar
von den zitelosen
wart nie man so vro gemachet·
als ich von der lieben zaller zit·