Ob man mit lv́gen die sele nert·
so weis ich den der heilig ist·
der mir dike meine swert·
mich vberwant sin karger list·
dc ich in zeime frúnde erkos·
da wande ich stete fúnde·
min selb̾ sin mich da verlos·
als ich der werlte kv́nde·
sin lib ist alse valschelos·
sam dc mer der v́nde·
War vmbe sv̊cht ich froͤmden rat·
sit mich min selber herze trůc·
dc mich an den verleitet hat·
der mir noch nieman gůter dǒg·
es ist ein swacher mannes pris·
den er beget an wiben·
svͤsser worte ist er so wis·
dc man si moͤhte schriben·
den volget ich vntz vf dc is·
der schade mv̊s mir beliben·
186v Begvnde ich vehen alle man·
dc tete ich durh sin eines has·
wie schvldic weren si daran·
ia lonet meniger siner bas·
dú hat sich dvrh ir schoͤnen sin·
gesellet selekliche·
dú lachet swanne ich truric bin·
wir alten vngeliche·
nach leide hv̊b sich min begin·
dc senfte got der riche·