Nv mv̊s ich ie min alten nôt·
mit sange núwen vnd klagen·
wan si mir alse nahen lit·
dc ich ir vergessen nien enmac·
ir grůs mich vie dú mir gebot·
vil langen núwen kvmber tragen·
erkande si der valschen nît·
bas fuogete si mir heiles tag·
sol mir an ir gůt ende ergân·
die wile ich mv̊t von herzen han·
so mag vns beiden lieb geschehen·
swc si es lenget dc ist schade wil si mich iemer fro gesehen·
Von herzeliebes schulden hat·
min lip vil kvmberliche not·
dc si niemer kvnde groͤsser sin·
des helfent al die sinne iehen·
den es niht ze herzen gat·
noch in dú minne nie gebot·
die sprechent von der swere min·
was mir so grosses si geschehen·
das ich so trureklichen klage·
vnd truͤgen si das ich da trage·
min schade tet in alse we·
dc er si mv̊te vn mir darnach vil wol gelǒbten iemer me·
Ich enmag es in allen niht gesagen·
die mich da vragent zaller zit·
warvmbe ich also trurig lebe·
vnd ane wunneklichen mv̊t·
die selben hulfen mir es klagen·
die sich da sezent in den strit·
enpfahent die nv leides gebe·
dc enfrvmet noch endvnket gůt·
es sol in vnderzeiget sin·
dc ratet mir das herze min·
ich bin der sis verswigen sol·
swer wibes ere huͤten wil der bedarf vil schoner zúhte wol·