Sage das ich dirs iemer lone·
hast dv den vil lieben man gesehen·
ist es war vnd lebt er schone·
als si sagent vnd ich dich hoͤre iehen·
frowe ich sach in er ist fro·
sin herze stat ob irs gebietent iemer ho·
Ich verbúte im froͤide niemer·
lâsse eht eine rede· so tůt er wol
des bitte ich in húte vnd iemer·
dem ist also dc mans versagen sol·
frowe nv verredent úch niet·
er sprichet alles dc geschehen sol dc geschiet·
Hat aber er gelobt geselle·
dc er niemerme gesinge liet·
es ensi ob ich ins bitten welle·
frowe es was sin mv̊t do ich von im schiet·
ǒch mvgt irs wol han vernomen·
owe gebúte ichs nv dc mac ze schaden komen·
Ist aber dc ichs niht gebúte·
so verlúse ich mine selde an ime·
vnd verflůchent mich die lúte·
dc ich al der werlte ir froͤide nime·
alrerst gat mir sorge zů·
owe nvn weis ich ob ichs lasse oder ob ichs tv̊·
Das wir wib niht mvgen gewinne·
frúnt mit rede sine wellent me·
dc mvͤt mich ine wil niht minnen·
steten wiben tv̊t vnstete we·
wer ich des ich niene bin·
vnstete liesse er dannne mich so liesse ich in·