Nv mv̊s ich ie min altē nôt·
mit ſange núwen vn̄ klagē·
wan ſi mir alſe nahen lit·
dc ich ir v̾geſſen nien enmac·
ir grůs mich vie dú mir gebot·
vil langē núwen kvmber tragen·
erkande ſi der valſchen nît·
bas fuogete ſi mir heiles tag·
ſol mir an ir gůt ende ergân·
die wile ich mv̊t vō h̾zen han·
ſo mag vns beidē lieb geſchehē·
ſwc ſi es lenget dc iſt ſchade wil ſi mich iemer fro geſehē·
Von h̾zeliebes ſchuldē hat·
min lip vil kvmb̾liche not·
dc ſi niemer kvnde groͤſſer ſin·
deſ helfent al die ſinne iehen·
den es niht ze herzen gat·
noch in dú mīne nie gebot·
die ſpꝛechent vō der ſwere min·
was mir ſo groſſes ſi geſchehē·
das ich ſo trureklichē klage·
vn̄ truͤgen ſi das ich da trage·
min ſchade tet in alſe we·
dc er ſi mv̊te vn mir darnach vil wol gelǒbten iemer me·
Ich enmag es in allen niht geſagē·
die mich da vꝛagent zaller zit·
warvmbe ich alſo trurig lebe·
vn̄ ane wūneklichen mv̊t·
die ſelbē hulfen mir es klagen·
die ſich da ſezent in den ſtrit·
enpfahent die nv leides gebe·
dc enfrvmet noch endvnket gůt·
eſ ſol in vnderzeiget ſin·
dc ratet mir das h̾ze min·
ich bin der ſis v̾ſwigē ſol·
ſwer wibes ere huͤtē wil d̾ bedarf vil ſchon̾ zúhte wol·