Nv ist dv́ liehte heide val·
rife wil si twingen·
singen· mv̊s ich aber von des winters krefte·
svͤssen sanc der nahtegal·
wil er gar verdringen·
bringen· kann 88v er leit mit siner meisterschefte·
nement war·
wie winter gegen vns ziehe·
leider kreftig ist sin schar·
so ist der svmer schiehe·
fliehe· winter hat dc messer bi dem hefte·
Was klage ich der vogel sanc·
vnde die liehten heiden
beide· sit min leit ist worden klagebere·
nach der ie min herze ranc·
dú tůt mir so leide·
scheide· frowe mine lange wernden swere·
swanne ich sihe· ir liehten ougen blike·
von mir swenken ich vergihe·
dc ich danne erschrike·
dike· tv̊t ir fremden gros mich froͤiden lere·