Nv hat ſich dú zit v̾keret·
dc vil manigē ſoꝛge meret·
walt vn̄ ǒwe· die ſīt val·
da bi anger vn̄ dú heide·
die man ſach in liehtem kleide·
in den landē vb̾al·
da bi klage ich vogellin·
wā ſi ſingēt ſvͤſſe doͤne·
in des blvͤndē meien ſchoͤne·
ſeht dú mv̊ſſē trurig ſin·
Swie d̾ winter vns wil twingē·
doch wil ich d̾ liebē ſingē·
der min h̾ze nie v̾gaſ·
daſt ein wib in wibes gvͤte·
dú iſt ſo gůt fúr vngemvͤte·
dc nie niht gefroͤite bas·
mich vil ſendē danne ſi tůt·
ſwāne ich denke dc dú reine·
mich in h̾zen lieblich meine·
deſt fúr alle ſoꝛge gůt·
Frowe mīne ich wil dir dankē·
iem̾ m̾e an alles wankē·
durh ſo froͤiderichen vunt·
dc dv mir zefrowē fvnde·
d̾ ich min zedienſte ie gvnde·
dú lit an mins h̾zen grunt·
mīne tú ſo wol an mir·
hilf vnde 206v twing d̾ reinē ſinne·
dc ſi mich als ich ſi mīne·
ſich ſo wirt gedienet dir·
Dú vil ſuͤſſe dú vil reine·
dú vil liebe valſches eine·
der ich iemer dienen wil·
dú iſt mīneklichē ſchoͤne·
maniger tugende ich ſi kroͤne·
d̾ gewan nie wib ſo vil·
ſo iſt ir gebarē gůt·
ſi iſt ſtête·
ſi iſt fri voꝛ miſſerête·
ſi iſt mit zúhtē wol gemv̊t·
Koͤnde ich mīneklichen ſingē·
dc mvͤſt ir zelobe erklingē·
wan ſiſt ſchoͤne vn̄ wol geſtalt·
der vil ſvͤſſen der ich diene·
ſinge ich diſen ſang voꝛ wiene·
da der kúnig lit mit gewalt·
der bedenket des riches not·
ſo gedenke ich nach dem grůſſe·
dē ſo mīneklichen ſvͤſſe·
git ir múndel roſen rot·