Nv hat sich dú zit verkeret·
dc vil manigem sorge meret·
walt vnd ǒwe· die sint val·
da bi anger vnd dú heide·
die man sach in liehtem kleide·
in den landen vberal·
da bi klage ich vogellin·
wan si singent svͤsse doͤne·
in des blvͤnden meien schoͤne·
seht dú mv̊ssen trurig sin·
Swie der winter vns wil twingen·
doch wil ich der lieben singen·
der min herze nie vergas·
dast ein wib in wibes gvͤte·
dú ist so gůt fúr vngemvͤte·
dc nie niht gefroͤite bas·
mich vil senden danne si tůt·
swanne ich denke dc dú reine·
mich in herzen lieblich meine·
dest fúr alle sorge gůt·
Frowe minne ich wil dir danken·
iemer mere an alles wanken·
durh so froͤiderichen vunt·
dc dv mir zefrowen fvnde·
der ich min zedienste ie gvnde·
dú lit an mins herzen grunt·
minne tú so wol an mir·
hilf vnde 206v twing der reinen sinne·
dc si mich als ich si minne·
sich so wirt gedienet dir·
Dú vil suͤsse dú vil reine·
dú vil liebe valsches eine·
der ich iemer dienen wil·
dú ist minneklichen schoͤne·
maniger tugende ich si kroͤne·
der gewan nie wib so vil·
so ist ir gebaren gůt·
si ist stête·
si ist fri vor misserête·
si ist mit zúhten wol gemv̊t·
Koͤnde ich minneklichen singen·
dc mvͤst ir zelobe erklingen·
wan sist schoͤne vnd wol gestalt·
der vil svͤssen der ich diene·
singe ich disen sang vor wiene·
da der kúnig lit mit gewalt·
der bedenket des riches not·
so gedenke ich nach dem grůsse·
den so minneklichen svͤsse·
git ir múndel rosen rot·