Min froͤide wart nie sorgelos·
vnz an die tage·
dc ich mir kristes blůmen kos·
die ich hie trage·
die kv́ndent eine svmer zit·
dú also gar in svͤsser ǒgenweide lit·
got helfe vns dar
hin in den zehenden kor·
dar vs ein helle mor·
sin valsch verstossen hat·
vnd noch den gv̊ten offen stat·
Mich hat dú welt also gewent·
dc mir der mv̊t·
sich zeiner mâsse nach ir sent·
dest mir nv gv̊t·
got hat vil wol ze mir getan·
als es nv stat·
dc ich der sorgen bin erlan·
dú menigen hat·
gebvnden an den fůs·
dc er beliben mv̊s·
swanne ich in kristes schar·
mit froͤiden wunnekliche var·