Mich froͤit ane alle swere wol·
dc ich so liebú mere han vernomen·
der ich mich gerne troͤsten sol·
mir ist der mv̊t von grossen sorgen komen·
sit man der stete mac geniessen·
so ensol ir niemer mich verdriessen·
min herze ist ir mit trúwen bi·
freisch aber es dú schoͤne dc es mit valsche si·
so lasse si mich iemer mere fri·
Ich han nach wane dike wol·
gesvngen des mich anders niene bestůnt·
vnd lobe iedoch als ich da sol·
swa gůtú wib bescheidenliche tv̊nt·
dc búte ich minen frúnden ze eren·
vnd wil in iemer froͤide meren·
min eines wurde lihte rat·
swes mv̊t ie doch ze der werlte als der mine stat·
ich wene er menege sorge vf ere hat·