Maniger gruͤsset mich also·
der grůs tůt mich zemâsse fro·
hartman gen wir schowen·
ritterliche frowen·
mac er mich mit gemache lan·
vnd ile er zv̊ den frowen gan·
bi frowen truwe ich niht veruan·
wan dc ich mvͤde vor in stan·
Ze frowen habe ich einen sin·
als si mir sint als bin ich in·
wand ich mag bc vertribe·
dv́ zit mit armen wiben·
swar ich kvm da ist ir vil·
da vinde ich die div mich da wil·
dú ist ǒch mines herzen spil·
was tǒg mir ein zehohes zil·
IN miner torheit mir beschach·
dc ich zv̊ zeiner frowen gesprach·
frowe ich han mine sinne·
gewant an úwer minne·
do wart ich twerhes an gesehen·
des wil ich des si iv beiehen·
mir wib in solher mâsse spehen·
dú mir des niht enlânt beschehen·