Lieber svmer sint die blv̊men alle·
gar verdorben vnd dú gruͤne heide·
von dem winter swies halt vns gevalle·
er benimt vns vil der ǒgenweide·
als swinde ist sin getwanc·
vnd dú zit der vogellin leider alzelanc·
Er enkan so sere niht getwingen·
ich enwelle in froͤide helfen meren·
vnd hohe vs frîem mv̊te singen·
als kan der sin dc herze leren·
we wie spriche ich tore das·
liesse mich min sender mv̊t so svnge ich noch bas·
Wol in die nv tvgent vnd ere minnen·
wol in die nv rehter trúwen walden·
die lobe Ich mit allen minen sinnen·
vnd wúnsche in dc si mit selden alden·
er si man ald si ein wib·
selic mvͤssens iemer sin geeret si ir lip·