Jch wache vmb eines riters lib·
vn̄ vmbe din ere ſchones wib·
weke in frowe·
got gebe das eſ im wol erge·
dc er erwache vn̄ nieman me·
weke in frowe·
niht langer bît·
eſt an der zit·
ich bît ǒch niht wan dvr den willen ſin·
wiltvn bewarn·
ſo lâſſe in varn·
verſlaft er ſich ſo iſt dú ſchulde din·
weke in frowe·
Din lip der mvͤſſe vnſelig ſin·
waht̾ vn̄ al das weken din·
ſlaf geſelle·
din wachen das wer alles gv̊t·
din weken mir vnſanfte tv̊t·
ſlaf geſelle·
wahter in han·
dir niht getan·
wan alles gv̊t dc mir wirt ſelten ſchin·
dv gerſt des tages·
dc dv veriages·
vil ſender froͤiden von dem herzen min·
ſlaf geſelle·
Din zoꝛn der ſi dir gar vertragen·
der ritter ſol niht hie betagen·
weke in frowe·
er gab ſich vf die trúwe min·
do beval ich in den eren din·
weke in frowe·
vil ſelic wib·
ſol er den lip·
verliern ſo ſin wir mit im verloꝛn·
ich ſinge ich ſage·
eſt an dem tage·
nv weke in wan in weket doch min hoꝛn·
weke in frowe·