ICh wil nv den wolgemv̊ten singen·
den so rehtú froͤide sanfte tv̊t·
wer sol den verzagten froͤide bringen·
die man selten vindet wol gemv̊t·
wol in die so schone sich versinnent·
das si froͤide minnent·
vnd das man gůten wiben sprichet gv̊t·
OWe langer dienst so verlorne·
das ich niemen kan gesagen wie·
das rede ich vnd kvmet von eime zorne·
das erzúge ich wol das si den lie·
wil si durch die verkorne schulde·
mir versagen ir hvlde·
das gefriesch ich von gv̊tem wibe ê· nie·
Minnecliche ich von der gv̊ten svnge·
londe si mir mins sanges bas·
das mir eteswenne wol gelvnge·
wolte minne noh bedenken das·
was kan bas ein herzeleit verkeren·
vnd froͤide meren·
so das man schone lebe vnd ane has·