JCh wil nv den wolgemv̊ten ſingen·
den ſo rehtú froͤide ſanfte tv̊t·
wer ſol den verzagten froͤide bꝛingen·
die man ſelten vindet wol gemv̊t·
wol in die ſo ſchone ſich verſinnēt·
das ſi froͤide minnent·
vn̄ das man gůten wiben ſpꝛichet gv̊t·
OWe langer dienſt ſo verloꝛne·
das ich niemen kan geſagen wie·
das rede ich vn̄ kvmet von eime zoꝛne·
das erzúge ich wol das ſi den lie·
wil ſi durch die verkoꝛne ſchulde·
mir verſagen ir hvlde·
das gefrieſch ich von gv̊tem wibe ê· nie·
Minnecliche ich von der gv̊ten ſvnge·
londe ſi mir mins ſanges bas·
das mir eteſwenne wol gelvnge·
wolte minne noh bedenken daſ·
was kan bas ein herzeleit verkeren·
vn̄ froͤide meren·
ſo das man ſchone lebe vn̄ ane has·