Ivnge vn̄ alde·
froͤit úch gegē deſ meien zit·
wan es grůnet in dē walde·
ſeht wie ſchon er lit·
ſoſt dú heide·
ſvm̾lichē wohl bekleit·
dú hat blůmē vf ir kleide·
d̾ iſt ſi gemeit·
vf dē riſe·
doͤnēt wol zepꝛiſe·
vogellin ir ſchal·
ſvͤſſe wiſe·
ſinget nahtegal·
Swen die rifen·
twūgen vn̄ darzů d̾ ſnê·
d̾ ſol nv ze froͤidē grifen·
ſit man ſiht dē kle·
ſoſt min wūne·
gar ein reine ſelig wib·
mich froͤit wed̾ lǒb noch ſvnne·
niht wan ein ir lib·
die ich da meine·
deſt dv́ ſvͤſſe reine·
mir gelúkes vunt·
ſi aleine·
rot iſt ir der mvnt·
Die ich da meine·
lieb voꝛ allē liebe mir·
dú iſt alleſ wādels eine·
es lit lob an ir·
ſwen ſi mīnet·
d̾ wirt liebes wol gewert·
ob er rehte ſich v̾ſinnet·
ald er liebeſ gert·
ſvͤſſú mīne·
mīne meiſt̾inne·
mīne ich meine dich·
twing ir ſinne·
dc ſi mīne mih·
Frowe ſchoͤne·
frowe an d̾ min froͤide lit·
frowe die ich mit lobe kroͤne·
hilf eſt an der zit·
trut minſ h̾zen·
liebeſ lieb ich meine dich·
ſvͤſſe wende minē ſm̾zen·
troſt nv troͤſte mich·
frowe ich mv̊te·
deſ ī minem mv̊te·
dc min g̾nder mv̊t·
dich niht mv̊te·
ſoſt min wille gůt·