ICh wil aber singen·
wan es ist mir in dem mv̊te·
sit dú nahtegal geswigen ist·
des kan mich betwingen·
dú vil hêre vnd dú vil gůte
der an wibes eren niht gebrist·
mich froͤit wol·
dc ich singen sol·
also liebem wibe·
nâh ir minneklichen libe·
grôssen iamer ich vil sender dol·
Swer mir dc verkeret·
dc mich iamert nach der svͤssen·
den ist rehtes herze lieb vnkvnt·
der hat sich enteret·
wie kan er die sv́nde gebvͤssen·
die verdienet hat sin schvldig mvnt·
er weis niht·
dc min herze siht·
in ein paradýse·
swanne ich die gedanke wise·
nach ir der man hoher eren giht·
Mich hat lieb gedinge·
in den froͤiden her behalden·
dc ich bin vor leid ein teil behůt·
dc ist min gelinge·
wan ich wil ir gerne walden·
dar zů stúret mich min vrier mv̊t·
den ich han·
vnd ein lieber wan·
dc ich wol gedenke·
wa mit ich mir truren krenke·
wan sol vf genade fro bestan·
Froͤide ist also túre·
vnd als edel vnd so here·
dc si kv̂m ieman vergelten kan·
froͤide ist so gehúre·
wan hat froͤide from vnd ere·
froͤide stêt gar lobelichen an·
froͤide ist wert·
swa lieb liebes gert·
lieb kan leit vertriben·
liebú froͤide lit an wiben·
wol im swer da liebes wirt gewert·
Mohte ich froͤide vinden·
rehte froͤide als ich si meine·
so wer ich zer welte ein selig man·
so mvͤste an mir swinden·
leit vnd wolte mich dú reine·
minnen als ich mich ir minnen gan·
so wolt ich·
alrerst froͤwen mich·
mit den froͤidenrichen·
nieman kvnde mir gelichen·
wan sol vf genade fro bestan·