ICh wil aber ſingen·
wan es iſt mir ī dem mv̊te·
ſit dú nahtegal geſwigē iſt·
deſ kā mich betwīgen·
dú vil hêre vn̄ dú vil gůte
der an wibes eren niht gebꝛiſt·
mich froͤit wol·
dc ich ſingē ſol·
alſo liebem wibe·
nâh ir mīneklichē libe·
grôſſen iam̾ ich vil ſender dol·
Swer mir dc v̾keret·
dc mich iamert nach der ſvͤſſen·
dē iſt rehtes h̾ze lieb vnkvnt·
d̾ hat ſich enteret·
wie kan er die ſv́nde gebvͤſſen·
die v̾dienet hat ſin ſchvldig mvnt·
er weis niht·
dc min h̾ze ſiht·
in ein ꝑadýſe·
ſwanne ich die gedanke wiſe·
nach ir d̾ man hoher erē giht·
Mich hat lieb gedinge·
in den froͤiden her behaldē·
dc ich bin voꝛ leid ein teil behůt·
dc iſt min gelinge·
wan ich wil ir gerne walden·
dar zů ſtúret mich min vꝛier mv̊t·
den ich han·
vn̄ ein lieb̾ wā·
dc ich wol gedenke·
wa mit ich mir truren krēke·
wā ſol vf genade fro beſtan·
Froͤide iſt alſo túre·
vn̄ als edel vn̄ ſo here·
dc ſi kv̂m iemā v̾geltē kan·
froͤide iſt ſo gehúre·
wan hat froͤide from vn̄ ere·
froͤide ſtêt gar lobelichē an·
froͤide iſt w̾t·
ſwa lieb liebes gert·
lieb kan leit v̾tribē·
liebú froͤide lit an wibē·
wol im ſwer da liebes wirt gewert·
Mohte ich froͤide vindē·
rehte froͤide als ich ſi meine·
ſo wer ich zer welte ein ſelig man·
ſo mvͤſte an mir ſwindē·
leit vn̄ wolte mich dú reine·
mīnē als ich mich ir minnē gan·
ſo wolt ich·
alrerſt froͤwē mich·
mit den froͤidērichē·
niemā kvnde mir gelichē·
wā ſol vf genade fro beſtan·