IN dem walde vnd vf der gruͤnen heide·
meiiet es so rehte wol·
dc ich mich svͤzer ǒgenweide·
wol von schulden troͤsten sol·
so han ich vúr senenden mv̊t·
trost deheinen·
wan den einen·
das min vrowe ist gůt·
Wol im den der kleinen vogele singen·
troͤstet vnd des meijen schin·
wie kvnde dem an froͤiden bas gelingen·
wil er vro von beiden sin·
so hat er ir beider wal·
blv̊men springent·
vogele singent·
wunneklichen schal·
Ich froͤwe mich ir guͤte wol von schulden·
bas danne aller blůmen rot·
ich singe anders niht wan in hulden·
schiede mich von senender not·
wol mag mir ir werder grůz·
froͤide senden·
swere erwenden·
sorgen machen bv̊s·