Ich wil mit froͤiderichem mv̊te·
singen alle die wile ein wib·
ir gvͤte kere mirs zegv̊te·
die min herze vnd al der lip·
ane valsch in 152r ir gewalt betwungen hat·
so dc mir nie liebers wart geborn·
nimt si nv zegv̊tes wibes herzen rat·
so dinge ich dc dc min stetes lieb an ir niht si verlorn·
Swie vil ein wib vnfroͤide machet·
einem man der stete hat·
so si in dan einest an erlachet·
so dc es von herzen gat·
so ist sin drisseg ierig leit mit liebe hin·
dc erkenne ich bi mir selbem wol·
troste si mich noch der eigen ich da bin·
so vergvlde ich gar mit liebe swc ich leides gelden sol·
Verteilet mich dú schone ir guͤte·
hinnan hin als ǒch da hêr·
so twinget liebe min gemvͤte·
so dc ich des niht enber·
ich enhabe vúr gv̊t swc si mag an mir begen·
vnd enwil mich niht wan des besten zir versen·
swie si wil so wil ich dc min froͤide ste·
noh niemer lieb noh gv̊t an ir genade mir besche·