Ich wil dú ſeldehaften wib·
niht bitē wan des einen·
dc ſi mir ſin genedig ſo·
dc an ir laſter ſi·
ſwelh wib hat mīneklichē lip·
húbſchen vn̄ reinen·
wie kvnde ich da vō werden fro·
ob ſi wurde eren fri·
bete iemā reinē frowen gv̊t·
dc niht ir erē zême·
dē truͤge ich ſelten holden mv̊t·
dú bette iſt vngenême·
dú ſchadē ir eren tůt·
Dú gv̊ten wib ſint alſe gv̊t·
dc ich ir gůten guͤte·
zegv̊te niht v̾geſſen wil·
vnz an dc ende min·
ir ſvͤſſe ir edele· ir h̾ze ir mv̊t·
dc liebt hoch gemvͤte·
ich winſche in allen ſeldē vil·
ich wil ir diener ſin·
nv gere ich anders niht vō in
ze dienſtlichē lone·
wan ſwa ich bi gv̊tē frowē bin·
dc ſi mich grvͤſſen ſchone·
daſt mir ein gv̊t gewin·