Ich sach blv̊men schone erspringen·
dc ist vor dem walde schin·
da von mv̊s min herze ringen·
nach der lieben frowen min·
wil si mir genedig sin·
mit den vogelin wolde ich singen·
vns den lieben svmer bringen·
Genade frowe ich mv̊s verderben·
iemerliche vnd vnuerscholt·
ist iv liep dc ich mv̊s sterben·
ich wart nie frowen me so holt·
so wer zekvpfer worden golt·
lihte wil si pris erwerben·
lat si mich in ir dienste sterben·
Meien blvͤte vnd ǒch ir guͤte·
sint ein andern wol gelich·
swa die rosen stent in blvͤte·
die sint niht so minneklich·
als min lieb des froͤwe ich mich·
doch besweret min gemvͤte·
dc man ir so sere hvͤte·
Si verliesent alle ir hv̊te·
mag ich mich zv̊ ir versteln·
dc gefuͤget wol dú gůte
wan sol frúntschaft sere heln·
ellú hv̊te ist gar verlorn·
ob ich die lieben vinde aleine·
so schat vns ir hvͤten kleine·
Ach got wie brinnet mir min herze·
nach der lieben frowen min·
noh mere danne tvsent kerze·
ach got wan solde ich bi ir sin·
si ist so schoͤne vnd ǒch so fin·
als die viol in dem merzen·
dur si so lide ich manigen smerzen·
Solher swere so mich twinget·
nieman sich verkvnnen sol·
dv́ mich wol von sorgen bringet·
swenne si wil so wirt mir wol·
maniger minen kvmber klagt·
mit svͤssen worten vs dem mvnde·
der mir wol des todes gvnde·