Ich wil dú seldehaften wib·
niht biten wan des einen·
dc si mir sin genedig so·
dc an ir laster si·
swelh wib hat minneklichen lip·
húbschen vnd reinen·
wie kvnde ich da von werden fro·
ob si wurde eren fri·
bete ieman reinen frowen gv̊t·
dc niht ir eren zême·
den truͤge ich selten holden mv̊t·
dú bette ist vngenême·
dú schaden ir eren tůt·
Dú gv̊ten wib sint alse gv̊t·
dc ich ir gůten guͤte·
zegv̊te niht vergessen wil·
vnz an dc ende min·
ir svͤsse ir edele· ir herze ir mv̊t·
dc liebt hoch gemvͤte·
ich winsche in allen selden vil·
ich wil ir diener sin·
nv gere ich anders niht von in
ze dienstlichem lone·
wan swa ich bi gv̊ten frowen bin·
dc si mich grvͤssen schone·
dast mir ein gv̊t gewin·