ICh wil aber disen sang·
singen der mime·
ich mag niht geswigen me·
mir ist wirs danne e·
nie so sere mir betwang·
lib vn sinne·
dv́ vil liebe svnder wan·
ach wie sols ergan·
ach got sol ich svs verderben·
lat si mich niht erwerben·
dc mich grvͤsse ir mv́ndel rot·
seht so bin ich tot·
Lieb sich dar zv̊·
es ist niht ze frů·
also tů·
Ach wc ich der sorgen trage·
owe wie cleine·
mich veruahet swas ich kan·
ach ich sender man·
ach wc hilfet swc ich sage
owe dú reine·
tůt min herze trage vro·
ach wie kvmt dc so·
ach minne la mir gelingen·
ich bin gra von den dingen·
dc dv́ liebe smehet mich
also vesteklich·
Lieb sich dar zv̊·
es ist niht ze frů·
also tů·
Mir ist vngemach beschert·
lange mit leide·
dc ich niht gerůwen mag·
weder naht noch tag·
ich bin froͤiden gar behert·
minne nv scheide·
mich von sender arebeit·
die min herze treit·
ach reine fruht das verkere·
wiblich zuht an mir ere·
sit ich dir gebvnden bin·
troͤste mir den sin·
Lieb sich dar zv̊·
es ist niht ze frů·
also tů·