Ich sv̊chte wiser lúte rat·
dc si mich leren·
wie ich die behalde·
dú wandelberes niene begat·
vnd ie nach eren·
froͤiden pris bezalde·
min heil in ir genaden stat·
si kan vertriben
sorge der ich walde·
ir guͤte mich gehoͤhet hat·
dc si meren
nah ir eren manicvalde·
Ich horte wise lúte iehen·
eime wibe·
wunneklicher mere·
min ǒgen sa begvnden spehen·
ob an ir libe·
dú gefůge were·
nv han ichs wol an ir gesehen·
si kan vertriben senecliche swere·
vnd ist mir so von ir geschehen·
dc ich belibe
fro des ich vnsanfte enbere·
Min lip in ein gemvͤte swert·
sit er so ringent·
dc ich behuͤte·
dc er ist froͤiden vnbehert·
des er betwinget·
mich mit siner gvͤte·
an mir er niemer missevert·
wan dem gelinget·
ob vns niemer bôn gebluͤte·