Ich wc vil vngewon·
des ich nv wonen mv̊s·
dc mich der minne bant·
von sorgen liesse iht fri·
nv scheidet mich da von·
ein vngemacher grůs·
der wc mir vnbekant·
nv ist er mir als bi·
vil gerne were ichs vri·
mir en wart dú sele noch der lip·
deswar nie lieber danne mir ie wc ein wib·
dú eteswenne sprach dc selbe were ich ir·
nv hat sis gar verkert her ze mir·
Des liebes habe ich mich·
dvr got vil gar bewegen·
es wer ein tvmber wan·
duhte mich des ze vil·
ia lies er wunden sich·
do er vnser wolte pflegen·
der im des lonen kan·
wie seliclich er tůt·
wir toben vmbe gůt·
nv lant mih tvsent lande han·
ê ich sie danne wisse so mvͤste ich sie lan·
vnd enwirt mir dar nach niht wan siben suͤsse lanc·
vf besser lon stet aller min gedanc·