ICh můs von schulden sin vnfro· sit si iah do ich bi ir was·
ich moͤhte heissen eneas·
vnd solte aber des wol sicher sin si wurde niemer min tido·
wie sprach si do·
aleine froͤmdet mich ir lip·
si hat iedoch des herzen mich beroubet gar fúr ellú wib·
Mit gedanken mv̊s ich die zit vertriben als ich beste kan·
vnd lernen des ich nie began·
truren vnd sorgen pflegen des was vil vngewent min lip·
durh ellú wib·
wande ich niemer sin bekomen·
in so rehte kvmberliche not als ich von einer han genomen·
Min herze mv̊s ir kluse sin al die wile ich habe den lip·
so mv̊ssen iemer ellú wib·
vil vngedrungen drvinne wesen· swie lihte si sich getroͤste min·
nv werde schin·
ob rehte stete iht mvge gefromen·
der wil ich iemer gegen ir pflegen dú ist mir von ir gvͤte komen·
Mich mvͤt dc ich der lieben bin so verre komen des mv̊s ich wunt·
beliben dest mir vngesvnt·
ǒch solte mich wol helfen dc dc ich ir ie was vndertan·
sit ichs began·
so enkvnde ich nie den steten mv̊t·
bewenden rehte gar von ir wan si dc beste gerne tůt·