Ich enweis was ich ſinge
vō der naht dú git mir froͤidē niht·
min hohgedinge·
der lit an dem tage wā er iſt liht·
ǒch iſt ſin ſchin·
der frǒwē min·
vil gelich des mv̊s er ſelig ſin·
Er mag vō ſchuldē·
lobē die naht der ſeleklichē lit·
ſo mv̊s ich dvldē·
ſendú leit da vō trage ich ir nit·
vn̄ lobe den tac·
ſwenne ich mag·
ſehē dú mir wol geheilet ſoꝛgen ſlag·
Den tac ich ere·
do ich die vil gv̊tē erſt ſach·
ſit iemer mere·
gab dú naht mir leit vn̄ vngemach·
ſi iſt mir gram·
vn̄ ich ir ſam·
wol dir tag vil ſelig mvͤſſe ſin din nam·
Als mich beſeſſen·
nahtes habēt die ſoꝛgen alſam dú ſchar·
des wirt v̾geſſen·
ſa ſo mir der tag erſcheinet clar·
ſo kvmt ein wan·
dc ich ſvl gan·
die vil ſchonē tǒgen ſehen an·
Vil gerne ich wolde
lobē die naht er gienge es iemer ſo·
dc ich ir ſolde·
nahe ligē dú mich nv tv̊t vnfro·
wer w̾e ich dan·
ich ſelig man·
we dc mirs dú gůte niene gan·