Ich bin hohes mv̊tes·
hoher mv̊t mir sanfte tv̊t·
nie niht wart so gv̊tes·
so mit zúhten hoher mv̊t·
hohgeborn schone wib·
mag vil wol erwerben hohgemv̊tes ritters lip·
Ein wib mich behuͤtet·
hat vor truren minú zit·
gvͤtlich si mir gvͤtet·
an ir al min froͤide lit·
ich bin dvrh si hohgemv̊t
so ist dv́ vil schone von ir hohen tvgenden gv̊t·
Mit rot svͤssen mvnde·
sprach dv́ gůte wider mich·
ein wort zeiner stvnde·
des mv̊s min lip froͤwen sich·
smierende ir mvnt dc wort sprach·
do ich in ir liehten spilnden svͤssen ǒgen sach·
IR gv̊t wiplich guͤte·
nam es vs ir herzen grunt·
froͤide hohgemvͤte·
blv̊t mir an der selben stvnt·
do si sprach dc svͤsse wort·
dc ich iemer han fúr miner hohen froͤiden hort·
Mit ir worten svͤssen·
machet si mich hohgemv̊t·
ir vrlop ir gruͤssen·
mir von schulden sanfte tůt·
ich bin alles des gewert·
mir der tvgentrichen des min lip ze froͤiden gert·
ICh han von ir ere·
ich han von ir hohen mv̊t·
dannoch han ich mere·
von ir dc mir sanfte tůt·
froͤide wunne ritters leben·
dc hat si zelone mir vmbe minen dienst gegeben·
Ich han von der gv̊ten·
lip gv̊t ere gernden sin·
der vil wolgemv̊ten·
ritter ich mit trúwen bin·
swc si wil dc wil ǒch ich·
si ist gewaltig kúniginne iemer uber mich·