ICh enkvnde mit minem sange·
min lieben frowen hulde naher komen·
der ich han gedienet lange·
dirre zwiuel hat mir froͤide vil benomen·
hat ich iender trost nach wane
derst verlorn·
ich solte lihte froͤiden ane
sin geborn·
Sol min sprechen sol min singen·
sol min langer dienest sol min stetekeit·
niht ein liebes ende bringen·
ist es alles ein verlornú arebeit·
wie sint danne hin verswunden
mine tage·
han ich die genade fvnden
miner klage·
Riche also der tac so riche·
werdekeit vnd eren sost dú frowe min·
ir lob dc ist so lobeliche·
dc es wol von schulden mv̊s getúret sin·
danc habe si der werden mere·
dú sint gůt·
dc si stille vnd offenbere·
rehte tut·
Svmelicher wibe vnstete·
wil ich dc den gv̊ten wiben ere si·
ob ir enheinú missetete·
wa bekande man die besten danne bi·
vinden wir an einer libe·
missetat·
da bi einú tvsent wibe·
tvgende hat·
Fúr der welte wandelbere·
hat ich einen trost zefroͤiden mir genomen·
der mir doh der beste were·
wolt ein wib zehelfe minen froͤiden komen·
so koͤnde ich gefuͤgen dingen·
masse geben·
wol gesprechen wol gesingen·
wol geleben·