ICh enkvnde mit minē ſange·
min liebē frowē hulde naher komē·
d̾ ich han gedienet lange·
dirre zwiuel hat mir froͤide vil benomē·
hat ich iend̾ troſt nach wane
derſt v̾loꝛn·
ich ſolte lihte froͤiden ane
ſin geboꝛn·
Sol mī ſpꝛechē ſol min ſingē·
ſol min lang̾ dieneſt ſol min ſtetekeit·
niht ein liebes ende bꝛingē·
iſt es alles ein v̾loꝛnú arebeit·
wie ſint dāne hin v̾ſwūden
mine tage·
han ich die genade fvndē
miner klage·
Riche alſo der tac ſo riche·
w̾dekeit vn̄ erē ſoſt dú frowe min·
ir lob dc iſt ſo lobeliche·
dc es wol vō ſchuldē mv̊s getúret ſin·
danc habe ſi der w̾den mere·
dú ſint gůt·
dc ſi ſtille vn̄ offenb̾e·
rehte tut·
Svmelich̾ wibe vnſtete·
wil ich dc dē gv̊tē wibē ere ſi·
ob ir enheinú miſſetete·
wa bekande mā die beſtē dāne bi·
vīdē wir an ein̾ libe·
miſſetat·
da bi einú tvſent wibe·
tvgende hat·
Fúr d̾ welte wandelb̾e·
hat ich einē troſt zefroͤidē mir genomē·
d̾ mir doh d̾ beſte were·
wolt ein wib zehelfe minē froͤidē komē·
ſo koͤnde ich gefuͤgē dingen·
maſſe geben·
wol geſpꝛechē wol geſingen·
wol geleben·