Iarlanc vꝛijet ſich dú gruͤne linde
lǒbes vn̄ bluͤte gůt·
wund̾ guͤte blůt· des meien ê der w̾lte bar·
gerner ich durh liehte blv̊men linde·
húre in tǒwes fluͤte wůt·
danne ich wuͤte flůt· deſ rifen nv mit fuͤſſen bar·
mir tv̊nt we die kůlen ſcharpfen winde·
ſwint· v̾tanes winter leit·
dur dc minē mv̊te ſoꝛge ſwinde·
wint· min h̾ze ie kvme leit·
wand er kleiner vogellin froͤide nider leit·
Owe dc dú liebe mir niht dike·
heilet miner wundē fvnt·
ich bin fvndē· wūt· vō ir· nv mache ſi mich heil·
ſendeſ trurē lanc bꝛeit vn̄ dike·
wirt mir zallē ſtvnden kvnt·
wil mir kvndē ſtunt· gelúkeſ ſo vinde ich dc heil·
dc ſi mich in ſpilnde froͤide kleidet·
leit· an mir niht lange w̾t·
ir gewant min vngemvͤte leidet·
kleit· nie wart ſo rehte w̾t·
ſo dú wat d̾ mich dú h̾zeliebe dāne wert·
Welt wilt du nv zierē dich vil ſchone·
ſo gib dinen kindē· wint·
der niht winden· kint· zvneren mvge deſt min rat·
ſwer mit ſtete diene dir des ſchone·
hilf im ſoꝛge bindē· vint·
die dich vindē· bint· ſi zv̊ dir gib in hoꝛdes rat·
reinú wib den rat· mein ich zegv̊te·
mv̊t· vn̄ zuht iſt in gewant·
ſwen ſi kleident mit ir reinē mv̊te·
gv̊t· vn̄ edel dc gewant·
iſt dar vmbe ich vs ir dienſte mich noch nie gewāt·