IArlanc vō dem kaltē ſne·
valwēt blv̊mē vn̄ kle·
me· ſiht man gruͤnes lǒbes in dē walde niht·
ſchowēt wie der anger ſte·
iemerlichē aber als ê·
we· manigē kleinē vogellin da vō geſchiht·
manicvalt̾ ſoꝛgē ſchar·
twinget dc gevilde·
wilde· roſen lieht gevar·
ſint v̾ſwundē alzegar·
bar· wunneklich̾ blvͤte man die bǒme ſiht·
Swer bi liebe ſvnder nit·
diſe lange wīterzit·
lit· d̾ vergiſſet wol der ſvm̾lichen tage·
wan im ane wid̾ſtrit·
mīne hohgemvͤte wit·
git· vn̄ machet rīge ſineſ h̾zen klage·
wibeſ mīne meret bas·
froͤide ſendem māne·
danne· kle vō tǒwe nas·
wiſſent ſvnder allē has·
dc· wibeſ mīne kvmber vn̄ leit v̾iage·
387v Wib ſint gůt fúr vngemach·
wibes t̊ſt ie ſoꝛge bꝛach·
ſwach· vn̄ kleine machet trurē wibes lib·
wib ſint lieb̾ dinge ein tach·
dc man lieb̾s nie geſach·
ach· got wie ſelig ſint dú mīneklichen wib·
wiplich gvͤte ſanfte tůt·
mā ſol gůte frowen·
ſchowē· fúr des meien blůt·
wib ſint gv̊tes vb̾ gůt·
mv̊t· reiner wibe mag wol heiſſen leit vertrib·