Herre got geſegen mich voꝛ ſoꝛgen·
das ich vil wnnekliche lebe·
wil mir ieman ſī froͤide boꝛgen·
das im ein ander wider gebe·
die vinde ich vil ſchiere· ich weis wol wâ·
wan ich lies ir wnder da·
der ich vil wol mit ſinnen·
getrúwe ein teil gewinnen·
Alle min froͤide lit an einem wibe·
der herze iſt ganzer tvgēden vol·
vn̄ geſchaffen an ir libe·
das man ir gerne dienen ſol·
ich erwrbe ein lachen wol von ir·
des mv̊s ſi geſtaten mir·
wie mag ſis behvͤten·
ich froͤiwe mich nach ir gvͤten·
Als ich vnder wilen zir geſizze·
ſo ſi mich mit ir reden lat·
ſo benimt ſi mir ſo gar die wizze·
das mir der lip allvmme gat·
ſwenne ich iezo vō der rede kam·
geſiht ſi mich eineſt an·
ſo 143v han ichs vergeſſen·
was wolde ich dar geſeſſen·