Herre got gesegen mich vor sorgen·
das ich vil wnnekliche lebe·
wil mir ieman sin froͤide borgen·
das im ein ander wider gebe·
die vinde ich vil schiere· ich weis wol wâ·
wan ich lies ir wnder da·
der ich vil wol mit sinnen·
getrúwe ein teil gewinnen·
Alle min froͤide lit an einem wibe·
der herze ist ganzer tvgenden vol·
vnd geschaffen an ir libe·
das man ir gerne dienen sol·
ich erwrbe ein lachen wol von ir·
des mv̊s si gestaten mir·
wie mag sis behvͤten·
ich froͤiwe mich nach ir gvͤten·
Als ich vnder wilen zir gesizze·
so si mich mit ir reden lat·
so benimt si mir so gar die wizze·
das mir der lip allvmme gat·
swenne ich iezo von der rede kam·
gesiht si mich einest an·
so 143v han ichs vergessen·
was wolde ich dar gesessen·