Herre babest ich mac wol genesen·
wan ich wil iv gehorsam wesen·
wir horten úch der kristenheit gebieten·
wie wir des keisers solten pflegen·
do ir im gabent den gotes segen·
dc wir in herren hiessen vnd vor im knieten·
ǒch svlt ir niht vergessen·
ir sprachent swer dich segne dc der gesegent si·
swer dir flůche der si verflůchet·
mit flůche vol messen·
dvr got bedenkent úch da bi·
ob ir der pfaffen ere iht gerůchet·
Do gotes svn hie in erde gie·
do versv̊chten in die ivden ie·
also taten si eines tages mit dirre vrage·
si vrageten in ob ir fries leben·
dem riche iht zinses solte geben·
do verstv̊nt er wol ir hv̊te vnd ir lâge·
er iesch ein mv́nz isen·
er sprach wes bilde ist hinne ergraben·
des keisers sprachen do die merkere·
do riet er den vnwisen·
dc si den keiser liessen haben·
sin keisers reht vnd gote dc gotes were·
Herre keiser ir sit willekomen·
des kúniges name ist ú benomen·
des schinet úwer krone ob allen kronen·
úwer hant ist kreftic gv̊tes vol·
ir wellent úbel oder wol·
so mvget ir beidú rehten vnd lonen·
darzv̊ sage ich iv mere· die fúrsten sint iv vndertan·
vnd habent mit zúhten úwer kvnft erbeitet·
vnd ie der mîssenere· der ist iemer ivwer ane wan·
von gotte wurde ein engel ê· verleitet·