Gegen dem morgen·
suͤsse ein wahter lúte sank·
do er sach den orion·
da verborgen
wibes bilde zů zim drank·
durh minnen lon·
frǒwe here·
ia sult ir wachen·
ich sihe des nahtes krefte balde swachen·
in singe niht mere·
Wahter schǒwe·
sprach dc minnekliche wib·
ob der leide tag vf gê·
er sprach frǒwe
swer wol soldet mir den lip·
swenne es taget ich singe iv me·
ist der ritter·
hie inne frǒwe
vermide ich danne miner ǒgen schǒwe·
so wirt úwer froͤde bitter·
Hohem solde·
warte mir geselle min·
sprach dv frǒwe wol getan·
dc min holden·
lange bi mir mvge sin·
den ich vmbevangen han·
wahter liebe·
hilf mir in fristen·
mit dinen klv̊gen wol verholnen listen·
wirt sant mir zeinen diebe·