Frowe selig vrowe·
vrowe mines herzen vnd der sinne gar·
wend ir dc ich schǒwe·
langen kvmber vnd an alle vroͤide gar·
so sit stete an der getat·
als ir mir lange hant getan· seht sone wirt ǒch niemer sorgen rat·
Sit ir mich so leret·
dc ich stetekliche miner eren pflege·
des sit iemer geeret·
wol ǒch mich dc ir mich wiset rehte wege·
ir hant wol geraten mir·
swer als rehte raten kan· dur des rat ich gerne vnvůge enbir·
IR went mir verkere·
swc ich singe vnd ǒch 155r gesage· dast ane wer·
doch sold ich ú leren·
ich beswunge úch so mit miner růten ber·
dc ir hortent mine klage·
die ich nv langet hat geklaget vf wiblich gvͤte mine tage·
West ich nv den willen·
wie ir woltent villen also vilt ǒch ich·
sol man kint stilsen·
doch versten ich nv alrerst rehte mih·
ich bin selker růte vri·
des lob ich got dc es so ste· dc ich noh min selber vrowe si·
Selde schoͤne gvͤte·
hant die meisterschaft so sere an úch geleit·
dc mich min gemvͤte·
dar nach dir von so striteklichen treit·
dc ich habe den strit verlan·
dv̊t ir mir sus tůt ir mir so· dc heis ich doh alles wol getan·