Frowe selig frowe min·
an dinem dienste ich niene verzage·
swie dv wilt so wil ich sin·
da bi so merke wc ich sage·
frǒwe ich weis wol ob mir din frúndes grůs·
niene verdient· mine besten ivnge tage·
dc ich in sorgen alten mv̊s·
Min herze git mir wisen rat·
swie tvmb es von den iaren si·
dc ich ir dú tvgende hat·
si mit stetem dienste bi·
sit es mir so steten rat mit trúwen git·
des doch mir der lib der mv̊t noch nie wart vri·
des volge ich im gar an allen strit·
Do ich erst sin gewan·
so riet mir dc herze min·
ob ich iemer wurde ein man·
so solte ich ir zedienste sin·
nv ist mir komen dú zit dc ich dienen sol·
nv helf mir got dc ich ir tv̊ den dienest schin·
da von ich leides mich erhol·
Si ist vber minen lib·
vrǒwe vnd al des herzen min·
si vil wunderwerdes wib·
nv wes sol ich ir gerner sin·
wolde si den dienest min vnd minen sanc·
wa wurde iemer mir so grossú genade schin·
wa fvnde ich so rehte hohen danc·
Wa moͤhte mir so hohe komen·
min dienst vnd al min arebeit·
wan die ich han genomen·
dú hat schone vnd werdekeit·
hoher mv̊t dv́ twingest mir den lib zehoh·
vnd ist dir dc herze min dar zv̊ bereit·
wand es ie die nidern minne vloch·
Nidrú minne an froͤiden tot·
ist er dem si an gesiget·
git dú hohe sende not·
doch wol im der der selben pfliget·
si git sorge vnd ist dú sorge froͤiden rich·
frowe dc dich dú sorge min so ringe wiget·
da von so sorge ich steteklich·