ER ist komen wider mit gewalde·
den der meie hat vertriben·
svmer wunne ist im entrunnen balde·
der ist vor im niht beliben·
das svln wir zemasse klagen·
sit dv́ svnne· vns des meien wunne·
wider git in kurzen tagen·
Swem der winder hohgemvͤte swendet·
der mv̊s ofte trurig sin·
mir hat hohen mv̊t ein wib gesendet·
da von ist dc herze min·
swie es wittert fro fro fro·
von ir gvͤte· stiget min gemvͤte·
fúr die lieben svnnen hô·
Schoͤne von ir gvͤte ist min frowe·
si ist von ir schoͤne gv̊t·
swenne ich ir spilndú ǒgen schǒwe·
mir so blvͤt min hoher mv̊t·
rehte als in des meien zit·
tůnt die rosen· ir gvͤtlichs losen·
mir vil hohe froͤide git·
IR vil lieblich guͤtlich loͤslich gruͤssen·
tůt mir hohe froͤide kvnt·
svͤssiv wort dú kvnnen sv̊sselich svͤssen·
ir vil svͤssen roten mvnt·
swas ich mvnde· han gesehen
mine stvnde· so mv̊s ich ir mvnde·
fúr si alle roͤte iehen·
Si hat ir wibheit vil wohl behvͤtet
vor vnfrowelicher tat·
wol ir das si mir so guͤtlich gvͤtet·
da von min mv̊t hohe stat·
wie ist mir svs ergangen wie·
úwer frúnt sol hinnan
ich fúrhte er si zelange hie·