Der tag vnſ nahet·
wer niht v̾ſmahet·
diſen warnſang·
den ich hie ſinge·
ein waht̾ lute
ſang· ſw̾ bi trute
lige an armen blang
der hebe ſich ringe·
vns nahet balde ein liehter tag·
ich fúrhte melde dú nie gelag·
ze ſolhem dinge·
Owe vns beidē·
wir mvſſē ſcheidē·
ſp̋ch dc reine wib·
mit trehendē ǒgē·
ein vmbevahē
vn̄ ſmukē nahē·
lieb an liebeſ lieb·
ergienc da tǒgē·
d̾ ritt̾ ſpꝛach ze d̾ frowē ſin·
gebút mir lieb wan ich bin dī·
daſt ane lovgen·
Dv ſcheideſt hinnē·
ī minē ſinnē·
wart mir nie ſo we·
ſpꝛach dv́ vil reine
deſ mv̊s ich ſoꝛgē·
vúr diſen moꝛgē·
nach dir iemer me·
min froͤide iſt kleine·
dú frowe ſp̋ch gedenke an mich·
ſit ich ī rehtē h̾zen dich·
mit trúwē meine·