Der svmer mit gewalde hat·
bekleidet walt vnd ǒwe·
der anger wol geblvͤmet stat·
in svͤssem meientǒwe·
dú heide breit·
hat gruͤnu kleit·
an sich geleit·
ist mir geseit·
in wunneklicher schowe·
Min frowe ist gv̊t·
swie si doch tůt·
mich vngemv̊t·
Min vngemv̊te ist gar ze gros·
als ich úch wil bescheiden·
ich sten ir heile leider blos·
dú mich in senden leiden·
mit froͤmder tat·
an allen rat·
swies mir ergat·
nv lange lat·
als einen wilden heiden·
Min frowe ist gv̊t·
swie si doch tůt·
mich vngemv̊t·
Ich lobe ir kúsche vnd ǒch ir lip·
ir schoͤne 89r vnd ir gebaren·
in gesach nie minneklicher wib·
bi allen minen iaren·
swie dc mich nie
ir lob veruie·
doch sang ich ie
dort vnd hie·
swa ie die besten waren·
Min frowe ist gv̊t·
swie si doch tůt·
mich vngemv̊t·
Sol ich niht herzelieb beiagen·
noch hohe froͤide erwerben·
so mac ich doch von schulden klagen·
vnd mv̊s von leide ersterben·
kvmt ir gerich·
so grinmeklich·
als vber mich·
so scham si sich·
sol ich alsvs verderben·
Min frowe ist gv̊t·
swie si doch tůt·
mich vngemv̊t·
Mich bant ir liehter ǒgen blik·
vnde wil mich niht enbinden·
ich want mich in ir minnestrik·
vnd kan mich niht entwinden·
svs wart ich wunt
zer selben stvnt·
heý roter mvnt·
nv tv̊ mir kvnt·
súl ich genade vinden·
Min frowe ist gv̊t·
swie si doch tůt·
mich vngemv̊t·