Der al der werlde froͤide git·
der troͤste min gemvͤte·
min froͤide an der vil schonen lit·
nach der min herze wuͤte·
scheide frowe disen strit·
der in minem herzen lit·
mit reines wibes guͤte·
Dv nime dc frowe in dinen mv̊t·
vnd tv̊ genedekliche·
gegen dir vnsanfte mir dc tůt·
vnd sol ich von dir wichen·
dv la gegen mir den dinen has·
sone mac mir niemer werden bas·
wan in dem himel riche·
181r Vnd sold ich iemer dc geleben·
dc ich si vmbe vienge·
so mvͤse min herze in froͤiden sweben·
swenne dc also ergienge·
so wurde ich von sorgen fri·
ir genade stant dabi
ob si mir des verhienge·
Dú selde hat gekronet mich·
gegen der vil svͤssen minne·
des mv̊s ich iemer eren dich·
vil werde kúniginne·
swenne ich die vil schonen han·
sone mac mir niemer missegan·
si ist aller guͤte ein gimme·
Gepruͤfet hat ir roter munt·
dc ich mv̊s iemer mere·
mit froͤiden leben zaller stunt·
swar ich des landes kere·
also hat si gelonet mir·
gescheiden hat mich niht von ir·
fro zuht mit svͤsser lere·