Der al der w̾lde froͤide git·
der troͤſte mī gemvͤte·
min froͤide an der vil ſchonē lit·
nach der min h̾ze wuͤte·
ſcheide frowe diſē ſtrit·
der ī minem h̾zen lit·
mit reines wibeſ guͤte·
Dv nime dc frowe in dinen mv̊t·
vn̄ tv̊ genedekliche·
gegen dir vnſanfte mir dc tůt·
vn̄ ſol ich vō dir wichē·
dv la gegē mir den dinē has·
ſone mac mir niemer w̾den bas·
wan in dem himel riche·
181r Vn̄ ſold ich iemer dc geleben·
dc ich ſi vmbe vienge·
ſo mvͤſe min h̾ze ī froͤiden ſweben·
ſwenne dc alſo ergienge·
ſo wurde ich von ſoꝛgē fri·
ir genade ſtant dabi
ob ſi mir des v̾hienge·
Dú ſelde hat gekronet mich·
gegen d̾ vil ſvͤſſen mīne·
deſ mv̊s ich iemer eren dich·
vil w̾de kúniginne·
ſwēne ich die vil ſchonē han·
ſone mac mir niemer miſſegan·
ſi iſt aller guͤte ein gimme·
Gepꝛuͤfet hat ir roter munt·
dc ich mv̊s iemer mere·
mit froͤiden lebē zaller ſtunt·
ſwar ich des landeſ kere·
alſo hat ſi gelonet mir·
geſcheidē hat mich niht vō ir·
fro zuht mit ſvͤſſer lere·