Das ich dich selden grvͤze·
frǒwe das ist ane alle mine missetât·
ich wil das wol zúrnen mvͤze·
liep mit liebe swa es von frv́ndes herzen gat·
nit entrvre dv wis vro·
senfte dirnen sere svnen· das ist der minnen zeichen·
dv́ herze liebe wil also·
Ich gesach nie tage slichen·
so die mine tv̊nt ich warte in alles nach·
wisse ich war si wolten strichen·
mich nimt iemer wnder wes in si so gach·
si mvgen zv̊ dem komen der ir nit so schone phliget·
so la si denne schinen ob si wissen weme·
Dv solt eine rede vermiden·
frǒwe das gezimet den dinen wol·
spreches dvs ich woltes miden·
das die boͤsen sprechen so man lonen sol·
het er selde ich tete im gv̊t·
er ist selbe vnselig der das gern sprichet vnd niemer der geliche tv̊t·