Bi ſo grôſſen vngelingē·
dc dv́ w̾lt iſt als vnfro·
wil ich lachen vn̄ ſingen·
min gemvͤte ſtat alſo·
dc ſú heiſſent klagende not·
ſolde ich da mit iemer ringē
ſo were ich noch ſanfter tot·
Ich weis wol dc wibes gvͤte·
froͤidē fvnt wol kan gegeben·
da bi troſt vn̄ vngemvͤte·
des gedingen wil ich lebē·
dc ſi dv́ min herze hat·
voꝛ vnfroͤiden mich behvͤte
die wile es als úbel ſtat·
Wil dú mīnekliche gv̊te·
mīneklichē hvͤten min·
voꝛ vnfroͤide voꝛ vnmv̊te·
ſo mv̊s ich vil ſelig ſin·
hvͤten iſt dē ſenden leit·
als wunnekliche hv̊te·
w̾e mir ein ſeligheit·
Wil ſi gůte wil ſi reine·
wil ſi ſvͤſſe mīnenklich·
huͤten min voꝛ ſoꝛgē eine·
ſo bin ich vil froͤidē rich·
ſwc mir leides kan geſchehē·
dar vf ahte ich harte kleine·
wil ſi min ze frúnde iehē·
Ob ich mich ir w̾den mīne·
von ir ſchvldē mv̊s bewegē·
ſo bꝛinge ich die welt wol inne·
dc ich froͤide wil verpflegen·
wa vō ſolt ich weſen vꝛo·
ſwāne vō ir mine ſinne·
noh min mv̊t niht ſtvͤnde ho·